تاند (دوشنبه، د دلوې ۲۴ مه) د ترکیې او سوریې په زلزله کې، چې تراوسه پورې یې د مړینو شمېر تر ۳۵ زره اوښتی، کې لږترلږه د ۳۰۰ افغانانو مړینې تایید شوي دي.
په استانبول کې د افغان پناه غوښتونکو د ټولنې مشر رفیق حقیار رسنیو ته ویلي چې په ترکیه کې د زلزلې له کبله ۳۰۰ افغانان مړه شوي او شاوخوا ۵ زره نور ټپیان شوي دي.
د حقیار په وینا په ترکیه کې د دیره افغانانو کره شمېر نه دی څرګند ځکه چې ډیری یې قانوني اسناد نه لري.
ترکیې یو کال پخوا د هغو افغانانو شمېر، چې په ویزه او پاسپورت دغه هیواد ته تللي، شاوخوا ۳ لکه یاداوه خو ښايي تر دې ډیر د ایران له لارې په غیرقانوني ډول ترکیې ته تللي وي.
د ترکیې رسنیو هم تایید کړې چې د دغه هیواد په لسو زلزله ځپلیو ولایتونو کې تراوسه پورې د وژل شویو افغانانو شمېر ۳۰۰ تنو ته رسیږي. خو څرنګه چې لا هم باور کېږي چې تر کنډوالو لاندې به نور کسان هم پاتې وي، ممکن د افغانانو په شمول د ټولو تلفاتو شمېر نور هم زیات شي.
په همدې حال کې یو شمېر افغانان شکایت کوي چې په زلزله کې د مړو شویو عزیزانو جنازې نه ورسپارل کېږي.
دوی وايي، د ترکیې چارواکي په زلزله کې مړه شوي کسان په ډله ییزو قبرونو کې خارو ته سپاري.
په همدې حال کې په زلزله ځپلیو سیمو کې د غلاوو او د مرستو رسولو په چارو کې د خنډونو شکایتونه شوي دي.
د ترکیې ولسمشر رجب طیب اردوغان د شنبې په ورځ زلزله ځپلیو سیمو ته د سفر په ترڅ کې وویل:«موږ فوق العاده حالت اعلان کړی. یعني له دې وروسته که چا غلا کوله یا یې انسانان تښتول باید پوی شي چې حکومت به ډیر سخت چلند ورسره وکړي.»
خدای دی په نوموړی زلزله کی ټول مړه سوی کسان خصوصاً افغانان وبخښی.
مړه سوی کسان ټول د شهادت مرتبه لری او د جنت وړ دی خصوصاً که د ” هارپ ” د شیطانی پروژی د کارَولو په نتیجه کی تلف سوی وی.