تاند:( چار شنبه، د دلوې نولسمه)‏ ‏د پاکستان د پخواني ولسمشر جنرال پرويز مشرف جنازه پرون له دوبۍ ښڅ څخه د دغه هېواد کراچۍ ښار کې ته له ليږدول کيدو وروسته ادا او خاورو ته وسپارل شوه.

مشرف په داسې مهال، د کراچۍ په یوه پوځي ادیره کې خاورو ته وسپارل شو، چې د پاکستان د پارلمان غړو ورته له دعا کولو انکار کړی.

پرون د پاکستان د پارلمان مشر صادق سنجراني د عمومي غونډې په پای کې نوموړي ته د دعا غوښتنه وکړه، خو د پارلمان دېرو غړو د غوښتنې مخالفت وکړ او ويې وېل چې هغه ته دعا نه کوي.

 د شمالى وزيرستان استازي محسن داوړ د‌ مشرف لپاره د دعا غوښتونکو مخالفت کړی او ویلي، چې هغه بې شماره خيانتونه کړي دي.

د مشرف جنازه هم کمرنګه وه او د پاکستان مشهور سياستوال او څېرې پکې نه وې موجودې.

مشرف د 79 کلونو په عمر، يکشنبې، په ورځ په دوبۍ کې له اوږدې ناروغۍ وروسته ومړ.

پرویز مشرف په 1943 کې، د اوسني هندوستان په ډيلي کې زیږېدلی و.

 د هند د وېش پر مهال د هغه پلار د پاکستان کراچۍ ښار ته کډه شوی و.

 مشرف په کال 2016 کې د پاکستان نه دوبۍ ته تښتېدلی و. د هغه خلاف د ملي خیانت تورونه لګول شوي وو .

 مشرف په 1999 کې، هغه مهال چې د پاکستان د پوځ مشر و، د وخت د ټاکل شوي صدراعظم نواز شريف حکومت نسکور او پوځي حکومت اعلان کړ.

په 2019 کې د پاکستان محکمې هغه ملي خاین وباله او د مرګ سزا يې ورته اعلان کړه.

مشرف په وروستيو کلونو کې د ناروغۍ په پلمه له هېواده تښتیدلی او په دوبۍ کې جلا وطنه و.

نوموړي ته افغانان هم په پراخه کچه د نفرت په سترګه ويني او په خاص ډول د افغانستان د تیرې شل کلنې جګړې د يوه مهم عامل په توګه ېې يادوي.

مشرف په يوه مرکه کې د افغانستان د جمهوري نظام پر ضد د طالبانو بیا منسجمول تاييد کړي او ويلي وو، چې طالبان او حقاني شبکه د پاکستان اتلان دي.