پخوانی لوی څارنوال عبدالجبار ثابت ومړ

تاند:( پنجشنبه، د دلوې شپږمه)‏ د افغانستان پخوانی لوی څارنوال عبدالجبار ثابت له دې نړۍ سترګې پټې کړې.

په ويکيپېډيا کې د نوموړي د ژوند ليک له مخې، دی په ١٣٢٤ کال د لوګر په محمداغې ولسوالۍ کې زيږيدلی او په قوم ستانکزی و، خو د نوموړي نيږدې سرچينو تاند ته وويل، چې ثابت اصلا د ننګرهار د سره رود ولسوالۍ د ککړ سيمې اړوند و.

نوموړی ، د کابل له حبيبيې لېسې او د کابل پوهنتون د حقوقو او سياسي علومو له پوهنځي فارغ شوى او په حقوقو او اقتصاد کې يې په ١٣٥٦ کال کې په امريکا کې ماسټري تر لاسه کړې وه .

ثابت ، په ١٣٥٦ کال کې له امريکا نه افغانستان ته راستون او تر ١٣٥٩ کاله يې په عدليه وزارت کې د سلاکار په توگه کار وکړ.

 نوموړى ، له دې وروسته د پېښور پوهنتون د منځني اسيا د مطالعاتو په مرکز کې د استاد، په پېښور کې د افغان اسلامي پوهنتون د مرستيال او له امريکا غږ راډيو سره د خبريال په توگه دندې تر سره کړې .

 هغه له ١٣٨٢ کاله تر ١٣٨٤ کاله د کورنيو چارو وزارت حقوقي سلاکار و او له دې وروسته د هېواد د لوى څارنوال په توگه وټاکل شو.

 ثابت ، په ۲۰۰۹ کې وروسته له هغه چې ولسمشرۍ ته يې د خپل ځان د کانديدېدو اعلان وکړ ، د ولسمشر لخوا د لويې څارنوالۍ له دندې گوښه شو .

 نوموړي ويلي وو ،چې ١٢ اقتصادي ، سياسي او نور کتابونه يې ليکلي او ژپاړلي او ټول چاپ شوي دي .

عبدالجبار ثابت يو ځل له ننګرهار څخه ولسي جرګې ته هم کانديد و، خو بريالی نه شو او ورسره د درغلۍ ادعا يې وکړه.

هغه له ۲۰۱۱ څخه وروسته د حنیف اتمر په مشرۍ د حق او عدالت ګوند د رهبرۍ غړی و، خو د ۲۰۱۴ د ولسمشريزو ټاکنو په نیمايي کې له ولسمشر غني څخه خوابدی او د هغه د مخالف کانديد ډاکټر عبدالله ملاتړی شو.

عبدالجبار ثابت د لوی څارنوالۍ د دندې پر مهال له فساد سره په جدي مبارزې او قاطعيت هم ډېر مشهور و‌.