تاند:( پنجشنبه، د جدي ۲۲) د طالبانو د ریاست الوزراء اقتصادي مرستیال ملا عبدالغني برادر اخوند نن بلخ ته د سفر پر مهال د شمالي ولايتونو لپاره خپلو يو شمېر واليانو سره د کانونو د استخراج په اړه خبرې وکړې.
د ملا برادر دفتر په یوه اعلامیه کې ویلي:« نوموړي سره د کانونو او پټرولیم وزیر هم ملګری و، دوی د بلخ، سرپل، جوزجان او سمنګان له واليانو او د کانونو رئیسانو سره د کانونو د استخراج، انتقال او د قراردادونو د تطبیق په برخه کې د روڼتیا، په ځانګړي ډول د ډبرو سکرو د پروسې چټکتیا، شفافیت او فني توګه د را ایستلو، په اړه خبرې او لازمې سپارښتنې ورته وکړې.»
ملا برادر خپلو مسوولینو ته ويلي چې کانونه د دې هېواد سرمایه او د ملي عوایدو د جوړولو بنسټیزه سرچینه ده، د دې ملي شتمنۍ په ساتنه او د شفافیت په تأمین کې پوره هڅه وکړئ.
همداراز یې خپلو امنیتي مسئولینو ته سپارښتنه کړې، چې په اړوندو ولایتونو کې د کورنیو او بهرنیو قراردادیانو امنیت ته پوره توجه وکړي او هېڅوک يې د هڅو خنډ جوړولو ته پرې نږدي .
دا په داسې حال کې ده، چې تېره اونۍ طالبانو د چين يوې کمپنۍ سره د آمو حوزې د نفتو د استخراج تړون لاسليک کړ.
د چين ځینو رسنیو انديښنه ښودلې، چې داعش ډله یې ممکن پانګوال په افغانستان کې هدف وګرځوي.