تاند:( شنبه، د جدي لسمه) پاکستاني چارواکو په کراچۍ ښار کې د ۱۲۰۰ افغان کډوالو د نیولو خبر ورکړی.
د پاکستاني چارواکو د ادعا له مخې، دغه کډوال په ناقانونه توګه د پاکستان خاورې ته راغلي وو.
دوی په دې اړه له ډیرو جزییاتو پرته اسوشیتد پريس خبري اژانس ته ویلي، چې یاد شوي افغان کډوال به د بند مودې له پای ته رسولو یا د مدافع وکيلانو له لوري یې د لازمو اسنادو له وړاندې کولو سره افغانستان ته ستانه کړل شي.
په پاکستان کې د طالبانو تر کنټرول لاندې د افغانستان سفارت له پاکستاني چارواکو غوښتي، چې نيول شوي کډوال خوشې کړي.
سرچینه زیاتوي، چې پاکستاني چارواکو د دغو کډوالو د خوشې کولو ژمنه نه ده عملي کړې.
له دې سره، د ټولنیزو رسنیو فعالانو د پاکستان په کراچۍ ښار کې د بندي افغان ماشومانو او مېرمنو پر خپرو شويو عکسونو خواشيني ښودلې او طالبانو ته په خطاب کې ېې ویلي، چې د افراطي ګامونو له کبله د افغانانو د ذلیله کیدو مسوول دي.