تاند:( جمعه، د جدي نهمه) د کندهار لپاره د طالبانو ځايي چارواکو ويلي، چې نن یې د دې ولايت په کچه تر ټولو لوی مسجد« جامع عمر» چې د طالبانو د تحریک د موسس ملا محمد عمر مجاهد په نوم نومول شوی، پرانيستی دی.
د کندهار لپاره د طالبانو د والي مطبوعاتي دفتر ويلي، چې پر دغه جومات له کلونو راهیسې کار روان و.
سرچینه زیاتوي، چې دغه جامع جومات اوس د لمانځه لپاره چمتو شوی او پاتې چارې به ېې هم ژر بشپړې شي.
د طالبانو په اړونده اعلامیه کې د ملا عمر نوم سره د « ولي کامل بت شکن» لقب هم ياد شوی.
ملاعمر د خپلې واکمنۍ په وروستيو کې د باميان ولايت د بودا د لرغونو مجسمو د الوزولو امر وکړ، چې په بوتان ویجاړ او د فرهنګي فعالانو په باور د افغانستان فرهنګي عظمت ته ېې درنه صدمه ورسوله.
طالبانو نه دي ويلي، چې ياد شوی لقب ېې رسمآ د خپل تحريک موسس ته ورکړی کنه؟
دوی د نوموړي په نوم د جوړ کړي جومات جزییات نه دي په ډاګه کړي.