تاند(یکشنبه، د جدي ۴ مه) د طالبانو له لوري په غیرحکومتي موسسو کې د ښځو پر کار د بندیز له اعلانیدو وروسته بهرنیو مرستندویو موسسو په افغانستان کې خپل فعالیت ودراوه.
سېف دي چلدرن، د ناروې د کډوالو شورا، او پاملرنې نن (یکشنبه) وویل، دوی له خپلو ښخینه کارکوونکو پرته په افغانستان کې مرستو ته د محتاجو ماشومانو، ښځو او نارینه وو لاسنیوی نه شي کولی.
دغو موسسو ته پرون د طالبانو د اقتصاد وزارت خبرداری ورکړ چې خپلې ښځینه کارکوونکې په کورونو کېښنوي کنې پر ضد به یې اقدام وکړي.
دغه وزارت د خپلې پرېکړې د دلیل په توګه ویلي چې په وروستیو کې یې داسي شکایتونه اورېدلي چې ګواکي په غیردولتي موسسو کې اسلامي حجاب او د امارت نور مقررات او قوانین نه رعایت کېدل.
د طالبانو حکومت په نړۍ کې یوازینی دولت دی چې اساسي قانون اونور قوانین نه لري.
د طالبانو د اقتصاد وزارت خبرداری ورکړی چې که غیرحکومتي موسسې د دوی امر ونه مني د فعالیت جواز به یې واخیستل شي.
طالبانو دا پرېکړه ۴ ورځې وروسته له دې وکړه چې نجونې یې له پوهنتوني زده کړو منع کړې او د دوی دا پرېکړه په افغانستان او نړۍ کې له سخت مخالفت سره مخامخ شوه.