تاند:(سې شنبه، د قوس دوه ويشتمه) د طالبانو د حاکمې ادارې اميرالمؤمنين ملا هبت الله اخندزاده د خپلې ادارې لپاره د تدارکاتو کمیسیون اعلان کړ.
د طالبانو د خبرپاڼې له مخې، نوموړي د طالبانو د رياست الوزرا اقتصادي مرستيال ملاعبدالغني برادر د دې کميسيون مشر ټاکلی دی.
په چارو کې د روڼتيا تامینول، د موثرو خدماتو وړاندې کول، د تدارکاتي ستونزو حل لارې موندل او د تدارکاتي چارو تنظيم د دغه کمیسیون مهمې دندې ښودل شوي دي.
دا په داسې حال کې ده، چې افغانستان له سخت اقتصادي ناورين سره مخ دی او خلک ېې د مهارولو لپاره له طالب مشرانو څخه د مسلکي کادرونو د ګومارلو غوښتنه کوي.
د طالبانو مشرانو د مخکيني جمهوري نظام مشران د تدارکاتي چارو په انحصار او له دې لارې په پراخ مالي فساد تورنول.