تاند:(چار شنبه، د قوس شپاړسمه) د پښتنو محصلینو ټولنې د پیښور په کرنيز پوهنتون کې د باچا خان امن میله په نوم درې ورځينۍ مېله پيل کړې، چې لا هم دوام لري.
دا مېله په داسې حال کې پیل شوې، چې په وروستيو کې بیا پښتونخوا د مرموزو تروريستي پېښو شاهد دی.
پښتانه ملتپال د پاکستان پوځ او استخبارات تورنوي، چې د يوې سناریو له مخې یې د تحريک طالبان پاکستان ډله بیا میدان ته کړې، چې هم پرې د پښتنو د سر او حساب سړي وژني او هم بیرته د طالبانو د ځپلو په نوم نړيوالو نه پیسې اخلي.
د باچا خان امن مېلې جوړونکو ويلي، مقصد یې نړۍ ته دا پیغام ورکول دي چې پښتانه د امن، مینې او ورورولۍ خلک دي او له ترهګرۍ څخه کرکه لري.
د پښتونخوا د ولايتي پارلمان غړې میرمن ثمر هارون بلور وویل پښتونخوا کې هدفي وژنې زياتې شوي، تر دې چې د ايالتي پارلمان غړو نه قلنګ غوښتل کیږي.
میرمن ثمر وایي “مونږ به د خپلو ځوانانو تر څنګ د سولې د ټینګښت لپاره په هر ډګر ولاړ یو”
تمه ده،چې د دسمبر په اوومه به د میلې په وروستۍ ورځ د غني خان بابا په نوم لویه مشاعره هم تر سره شي.