تاند:(دوشنبه، د قوس څوارلسمه) د افغانستان د خصوصي بانکونو ټولنې ويلي، چې خصوصي بانکونو ته د امانتونو سپارل زيات شوي.
د دغې ټولنې اجرایوي رییس نجیب الله امیري ویلي، چې له دې سره د بانکونو د نقدو پيسو د کمښت ستونزه مخ په کمیدو ده.
د نوموړي د معلوماتو له مخې، اوس هم بانکونه په ټاکلي مقدار خلکو ته د دوی پيسې ورکوي، خو تر پخوا په بانکونو کې د نقدو پيسو د کمښت ستونزه کمه شوې ده او بانکونه له خطرناک وضعیت څخه را وتلي دي.
سرچينه په وروستيو مياشتو کې افغان بانکونو ته د خپلو شتمنيو د سپارلو په برخه کې د ۴ سلنه زياتوالي خبر ورکوي.
افغانستان دمګړۍ ۷ خصوصي، ۳ دولتي او ۲ هم د نړیوالو بانکونو نمایندګۍ لري.
د طالبانو له واکمنيدو سره، د اسلامي قرضو د ورکړې يوه بانک هم خپل کار پيل کړی.
دا په داسې حال کې ده، چې خلک لا هم په بانکونو کې د خپلو پخوانيو پيسو د نه ترلاسه کولو له امله شکایت کوي او له بانکي چارواکو ېې د حل غوښتنه لري.
په وروستيو کې امريکا متحده ايالاتو د نقدو پيسو د کمښت د مخنيوي او افغاني بانکنوټونو او اقتصاد د نه سقوط په موخه افغانستان ته د اونيزو ډالري کڅوړو د مرستو استول زیات کړي.