تاند:(شنبه، د قوس دولسمه) د جمهوري نظام پر مهال د مصالحې عالي شورا د پخواني رييس عبدالله عبدالله وياند او نيږدې ملګري مجيب الرحمن رحيمي د پرزول شوي جمهوري نظام د دويم مرستيال سرور دانش په وروستيو څرګندونو، چې د افغان کليمې او فېډراليزم په اړه يې کړي، توند غبرګون ښودلی.
رحيمي، چې د افغان کليمې مخالفت او د افغانستان د فيدرالي کيدو غوښتنه تر ډېره خپله نظريه بولي او په دې نوم سياست کوي،
نوموړي د جمهوري نظام پر مهال سرور دانش د يادو څرګندونو سر سخت مخالف بللی او ویلي، چې وروستۍ څرګندونې يې په ډاګه کوي چې دانش فرصت غوښتونکی، مناقق او دروغجن دی.
مجیب الرحمن رحیمي دغه راز سرور دانش « ډ ورځې د نرخ سړی» ګڼلی او ویلي، چې هغه نه هغسې « بې مالګې» او نه لکه اوس« تروش» ښه ښکاري.
سرور دانش په یوه تازه مرکه کې له خپل افغانیت څخه منکر شوی، چې د خلکو توند غبرګونونه ېې را پارولي.
دانش د بي بي سي دې پوښتنې ته په ځواب کې چې آيا ځان افغان بولي ویلي؟:« په دې اړه افغانان د نظر اختلاف لري، د اساسي قانون د جوړیدو پر وخت هم په دې اړه ناندرۍ وې.»
نوموړي دغه راز په افغانستان کې د فېډرالي نظام د رامنځته کیدو غوښتنه کړې ده.
ډېرو نورو افغانانو هم سرور دانش په دغو څرګندونو غندلی او د هغه څرګندونې یې د پردو په اشاره په افغانستان کې د ملي یووالي او ملي هويت خلاف دسیسه بللې ده.
ښاغلي دانش د خلکو نیوکو ته غبرګون نه دی څرګند کړی.