تاند:(جمعه، د قوس څلورمه) د طالبانو د حاکمې ادارې وياند ذبيح الله مجاهد يو ځل بيا پر امريکا متحده ايالاتو دوی سره د دوحې د ترسره کړي تړون د ماتولو تور پورې کړی.
مجاهد په تازه څرګندونو کې د طالبانو پر مشرانو د سفرونو د بندیزونو دوام او د دوی سره د دغه هېواد د اړيکو نه عادي کیدل د دوحې له تړون څخه د امریکا د سرغړاوي ادعا شوي موارد بللي.
د مجاهد په وينا، د امریکا د دغو سرغړاویو له امله د طالبانو مشران د ځينو سفرونو پر مهال له ځینو ستونزو سره مخ کیږي.
طالب ویاند دا څرګندونې په داسې حال کې کړي، چې د امریکا په ګډون د افغانستان بېلابېل سیاسي لوري او د طالبانو نور منتقدین دوی د دوحې تړون په نقض او د سولې بهير په ناکامۍ تورنوي.
طالبانو او امریکا دواړو په دې اړه د یو بل تورونه رد کړي دي.