تاند:( سې شنبه، د قوس لومړۍ) د پنجشېر لپاره د طالبانو والي مولوي محمد محسن هاشمي د پخواني قومندان احمد شاه مسعود مقبرې ته ورغلی او ویلي، چې د هغه د مقبرې ساتلو ته ېې ساتونکي او خدماتي پرسونل ګمارلي دي.
نوموړي دا هم ویلي، چې دوی د هیچا مقبرې ته د سپکاوي طرفدار نه دي او د مسعود مقبره به هم خوندي وي.
دا په داسې حال کې ده، چې مخکې څو ځلې د مسعود پلویانو د طالبانو لخوا د نوموړي مقبرې ته د سپکاوي او شناختو د ماتېدو ادعاوې کړې وې.
د طالبانو وياندويانو دغه ادعاوې بې بنسټه ګڼلې وې.
د مسعود زوی احمد مسعود، چې په تاجيکستان کی مېشت وي، د طالبانو خلاف د يوې جنګي ډلې مشري کوي.