تاند:(دوشنبه، د عقرب دېرشمه) په پاکستان کې ځينو باوري سرچينو تاند ته ويلي چې د افغانستان د بريښنا شرکت پخوانی رييس امان الله غالب په کابل کې له بانکونو څخه د خپلو پيسو له ايستلو وروسته پاکستان ته تللی.
ښاغلی غالب د طالبانو د ادارې لخوا له افغان شخصیتونو سره د اړيکو کميسيون له لارې څو مياشتې مخکې له یوه بهرني هیواد څخه کابل ته ستون شوی و.
نوموړي په خپلو څرګندونو کې د طالبانو د ادارې ملاتړ کړی او له نورو بهر مېشتو سياستوالو يې هم د هېواد ته ستنیدو غوښتنه کړې وه.
څو مياشتې مخکې د کابل له یو شمېر بانکونو څخه د نوموړي عکسونه خپاره شوي او ادعا شوې وه، چې دی کابل ته له بانکونو څخه د خپلو پيسو د ترلاسه کولو لپاره ستون شوی.
تاند د پاکستان په پلازمېنه اسلام اباد کې د ښاغلي غالب د موجودیت پروني عکسونه هم ترلاسه کړي، خو په دې اړه ورسره په خبرو نه دی توانیدلی.
د طالبانو د اړيکو کميسيون ويلي، چې شاوخوا ۴۰۰ پخواني چارواکي او دولتي منسوبین یې په بلنه بیرته هېواد ته ستانه شوي دي.