تاند:( چارشنبه، د عقرب پینځه ويشتمه) د طالبانو د دفاع وزارت سرپرست ملا یعقوب مجاهد د اسلامي همکاریو سازمان له پلاوي سره د لیدنې پر مهال ويلي، چې ټولې نړۍ ته د افغانستان له پولو د ښې ساتنې او چا ته ورڅخه د خطر نه پېښیدو ډاډ ورکوي.
نوموړي ټینګار کړی، چې د دوحې تړون عملي کیدو ته ژمن دي او د افغانستان له خاورې به هیچا ته د چا خلاف د استفادې اجازه ورنه کړي.
د طالبانو د دفاع وزارت په اعلامیه کې راغلي، چې د اسلامي همکاریو سازمان پلاوي د افغانستان د امنيت تامينولو، له نیشه یي توکیو او دغه راز داعش ډلې سره د طالبانو د مبارزې هڅې ستایلي دي.
د طالبانو يادې څرګندونې په داسې حال کې دي، چې د دوی له ادارې افغانان د دوحې تړون په اساس د ټولو ژمنو عملي کول غواړي.
طالبانو په ياد شوي تړون کې د افغانستان له خاورې چا ته د ناوړه استفادې د مخنيوي تر څنګ د بین الافغاني مذاکراتو له لارې په هېواد کې له ټول شموله حکومت جوړيدو، له افغانستانه د امریکايي ځواکونو د خوندي وتو، د ښځو او بشري حقونو د تامين او نورو مهمو مسايلو په اړه ژمنې کړې وې.
له دې سره دوی ادعا کوي، چې خپلې ټولې ژمنې ېې امريکا او متحدينو سره ېې عملي کړي دي.