تاند:(پنجشنبه ،د عقرب نولسمه) د پاکستان په پارلمان کې د وزيرستان پښتون ملتپال استازي او د ملي جمهوري غورځنګ ګوند مشر محسن داوړ د افغانستان له بې واکه شوي ولسمشر محمد اشرف غني سره په متحده عربي اماراتو کې لیدلي.
ښاغلي داوړ په دې اړه په خپله فیسبوک پاڼه کې لیکلي:«له ولسمشر محمد اشرف غني سره په لیدنه خوشحاله شوم. هغه په افغانستان او سیمه کې د سولې لپاره کار کولو ته ژمن دی.»
د یادې لیدنې په اړه نور جزییات نه دي ورکړل شوي.
ولسمشر غني د جمهوري نظام له سقوط وروسته متحده عربي اماراتو ته پناه وړې، چې په وروستيو کې ېې د لیدنو کتنو خبرونه زيات شوي.
څه موده مخکې د نوموړي ورور حشمت غني احمدزي، پخواني سلاکار عبدالرشيد ايوبي او یو شمېر نورو کسانو له هغه سره د خپلو لیدنو خبر ورکړی و.