تاند:(چار شنبه ،د عقرب اتلسمه) په افغانستان کې د ایران شارژدافیر حسن مرتضوي په یوه غږیز کلپ کې د طالبانو د حاکمې ادارې د مخالفانو په نه ملاتړ ټينګار کړی.
د راپورونو له مخې، دغه غږیږ کليپ بلخ ته د ایران د شارژدافیر د سفر اړوند دی.
نوموړي طالبان له ۴۰ کلونو وروسته د افغانستان د ازادۍ ګټونکي او د امنيت تامینونکي ياد کړي.
د ايران شارژدافیر په دې کلیپ کې دا هم ویلي، چې هېواد ېې له ډېرو کلونو راهيسې طالبانو سره اړیکې او ملاتړ درلود.
د ایران دغه شارژدافیر چې مخکې د سپاه پاسداران استخباراتي ځواک مهم غړی و، امریکا په افغانستان کې د طالبانو د ناکامولو په هڅو تورنه کړې او د دغو هڅو د ناکامولو لپاره ېې د طالبانو په ملاتړ ټينګار کړی.
ايران مخکې د طالبانو د ملاتړ تورونه رد کړي وو.
دا په داسې حال کې ده، چې ويل کيږي د طالبانو د یو شمېر مخالفو وسله والو ډلو ځینې لوړپوړي غړي ایران کې دي او له هغه ځايه ېې پر ضد فعاليتونه سمبالوي.