تاند:(پنج شنبه ،د عقرب دولسمه) د بشري حقونو مشهورې مدافع ادارې (د بښنې نړېوال سازمان) د جنګي جرمونو پر ضد د نړیوالې محکمې له هغې پریکړې هرکلی کړی،چې وايي د طالبانو او حقاني شبکې د جنګي جنایتونو په اړه پلټنې کوي.
د بښنې نړېوال سازمان په ورته مهال له يادې محکمې غوښتي،چې دغه پلټنې دې د افغانستان د جګړې د ټولو خواوو پر جنایتونو متمرکزې کړي.
د جنوبي اسیا لپاره د بښنې نړېوال سازمان د څانګې مشرې یمیني میشرا د شورو ويلي، چې د ای سي سي څارنوال باید له دې موقعې ګټه واخلي او سمدستي د جګړې د ټولو اړخونو په اړه تحقیقات پیل کړي.
نوموړې زياتوي:”روانه اوونۍ د جرمونو د نړیوال عدالت پرېکړه په افغانستان کې انصاف ته د اوږده انتظار لپاره، په ځانګړې توګه د طالبانو او حقاني شبکې له خوا د ترسره شویو جرمونو د قربانیانو لپاره یوه هیله ده”.
یمیني میشرا زیاتوي، په پلټنو کې د ښه پرمختګ لپاره مدافع وکیلان ځینو هغو اغېزمنو خلکو ته په رسېدو کې باید سمدستي بیاکتنه وکړي چې مقدمو ته یې تر اوسه پاملرنه نه ده شوې او یا د عدالت لپاره له زورواکو مجرمانو پوښتل کېدل یې منع کړي دي.
د طالبانو د ادارې مرستيال وياند بلال کريمي بيا د نړيوالې محکمې پريکړې ته په غبرګون کې ويلي چې د دوی له بيا واکمنيدو وروسته په هېواد کې جګړه او جنګي جرمونه دواړه نشته.
هغه د تېرې شل کلنې جګړې پر مهال د بهرنيو ځواکونو د جنګي جرمونو په اړه د پلټنو غوښتنه کړې، خو پر طالبانو د ادعا شويو جنګي جرمونو د پلټنې په اړه ېې څه نه دي ويلي.
دا په داسې حال کې ده، چې تازه د طالبانو خلاف د يوې جنګيدونکې ډلې( ملي مقاومت جبهې) یوه غړي فضل احمد معنوي اروپا ته د طالبانو د ادعا شويو جنګي جنايتونو د اسنادو شریکولو په موخه اروپا ته د خپل سفر خبر ورکړی.
طالبانو په دې اړه څه نه دي ويلي، خو مخکې ېې په پنجشېر او نورو سیمو کې د خپلو وسله والو مخالفانو خلاف د جنګي جرمونو ادعاوې بې بنسټه ګڼلي دي.