تاند:(سې شنبه ،د عقرب درېيمه) د افغانستان لپاره د ایران د ولسمشر ځانګړي استازي حسن کاظمي قمي پر امريکا متحده ايالاتو تور پورې کړی، چې په افغانستان کې د طالبانو له حاکمې ادارې سره د دوی د اړیکو د خړولو او خپلمنځیو نښتو د رامنځته کیدو هڅې کوي.
نوموړي په تازه څرګندونو کې د طالبانو له اړخه د ټول ګډونه حکومت نه رامنځته کول هم د ايران او طالبانو د نه تعامل يو اصلي دليل ياد کړی.
ايراني استازي د خپلې دغې ادعا په اړه نور توضیحات نه دي ورکړي، چې امريکا په کوم ډول د دوی او طالبانو ترمنځ د اړيکو د خرابولو هڅې کوي.
د ايران د حکومت رسمي خبري اژانس ایرنا څو ورځې مخکې په یوه تحلیلي مطلب کې د طالبانو ځينې ډلې امريکا سره په شکمنو اړيکو تورنې کړې وې.
معلومه نه ده، چې له دې ډلو څخه د ایراني اژانس هدف د طالبانو کوم کسان وو.
ايراني اژانس په قطر کې د طالبانو او امریکا متحده ایالاتو د استخباراتي مشرانو وروستۍ لیدنې او د بشري مرستو په نوم افغانستان ته د امریکا د لسګونه ميليونه ډالرو اونيزو نقدي مرستو ته هم د شک په سترګه کتلي وو.
طالبانو ایران سره د خپلو اړیکو د خنډونو او ډېر نه تعامل په اړه څه نه دي ويلي.
دوی له ټولو هېوادونو سره د ښو او متوازنو اړيکو خبر ورکړی، خو د سیمې ډېر هېوادونه د پاکستان په شمول د افغانستان له خاورې دوی ته د ترهګریزو خطرونو د موجودیت ادعاوې کوي.