تاند:(جمعه ،د ميزان ۲۲مه) د پاکستان صدراعظم شهباز شريف د سایکا په شپږمه سرمشريزه غونډه کې وويل، چې نړيواله ټولنه په افغانستان کې د تلپاتې سولې، ثبات او پراختيا لپاره د افغانانو د مبارزې ملاتړ کوي.
هغه په دې اړه څه نه دي ويلي،چې په دې برخه کې له مبارزې څخه ېې هدف د طالبانو که د دوی مخالفان دي.
پاکستاني صدراعظم زیاته کړې،چې د افغانستان په سوله او ثبات کې تر بل هر هېواد د پاکستان ډېره ګټه ده.
هغه په پاکستان کې د څلور میلیونه افغان کډوالو د موجودیت خبر ورکړی او ویلي،چې هېواد ېې خوندي، باثباته، متحد او سوکاله افغانستان غواړي.
دا په داسې حال کې ده، چې د ځینو طالب چارواکو په ګډون ډېری افغانان د افغانستان په اړه د پاکستان سياستونو ته د شک په سترګه ګوري او د بې ثباتۍ تر ټولو اصلي عامل یې بولي.