تاند:(جمعه ،د ميزان ۱۴مه) د افغانستان لپاره د اروپايي ټولنې ځانګړی استازی توماس نیکلاسون خبرداری ورکړی، چې د طالبانو د حاکمې ادارې پر وړاندې د افغانانو او نړیوالې ټولنې حوصله مخ په کمیدو ده.
نوموړي کابل ته د سفر پر مهال په يوه خبري ناسته کې ويلي،چې اروپايي ټولنه لا هم حوصله لري، خو ویني چې د طالبانو پر وړاندې د فرصت دروازې په تړل کیدو دي.
هغه طالبانو ته په خطاب کې وویل،چې د ټول ګډونه حکومت د جوړولو لپاره د افغانانو، گاونډیو هیوادونو او نړیوالې ټولنې غوښتنې ته غاړه کېږدي.
هغه همداراز ویلي چې د افغانستان گاونډیان په دې هیواد کې د فعالو ترهگرو ډلو په اړه اندیښنه لري او وایي چې طالبانو لا قناعت نه دی ورکړی چې دغه ډلې به د دوی پر خلاف نه کاریږي.
د طالبانو حاکمې ادارې په دې اړه څه غبرګون نه دی ښودلی.