تاند:(جمعه ،د ميزان ۸مه)د طالبانو د کورنيو چارو وزارت ویاند عبدالنافع ټکور وايي،چې د کابل ښار په لویدیځ کې د کاج په نوم پر ښوونيز مرکز ترسره شوي ننني ځانمرګي برید کې ۱۹تنه وژل شوي او ۲۷نور ټپیان دي.
هغه د وژل شويو او ټپیانو د هويت په اړه څه نه دي ويلي.
ځايي سرچينو ويلي،چې برید په دشت برچي سيمه کې د کاج په نوم پر يوه کورس شوی،چېرته چې د ازمايښتي کانکور ازموينه اخيستل کيده.
د برید مسوولیت چا پر غاړه نه دی اخیستی، خو په شیعه میشتو سیمو کې تر ډېره د ورته پېښو مسووليت داعش ډله پر غاړه اخلي.
ځايي سرچينو د مرګ ژوبلې د ارقامو د زیاتیدو هم ویلي، خو مسوولو سرچينو وروستي ارقام نه دي په ډاګه کړي.