تاند:(چار شنبه ،د ميزان ۶مه) د پښتون ژغورنې غورځنګ رهبر منظور پشتین وايي،چې د دغه غورځنګ د وکیلې منیزه کاکړ په هڅو د پاکستان په کراچۍ ښار کې د پولیسو له لوري نیول شوي يو شمېر افغان بنديان د محکمې په پریکړه له زندانه خوشې شول.
ښاغلی پښتين زياتوي،چې په خوشې شویو افغان بندیانو کې د مېرمنو ترڅنګ نارينه هم شامل دي.
نوموړي د خوشې شویو افغان بندیانو شمېر نه دی په ډاګه کړی.
پاکستان، ايران، تاجيکستان او ترکیې په وروستيو کې له افغان کډوالو سره ناوړه چلند زيات کړی.
د بښنې نړېوال سازمان څه موده مخکې پر دغو هېوادونو اعتراض وکړ او غوښتنه ېې وکړه،چې خپل دغه چلند بدل کړي.