تاند:( جمعه ،د ميزان اوله) د کابل لپاره د طالبانو د امنیه قومندانۍ ویاند خالد ځدراڼ د وزير اکبرخان جومات مخې ته د نن ماسپښين د چاودنې د مرګ ژوبلې ارقام خپاره کړي.
نوموړي ويلي،چې په دې پېښه کې ۷تنه وژل شوي او ۴۱ نور ټپيان دي.
ځدراڼ د مرګ ژوبله لرونکو کسانو د هويت په اړه تازه څه نه دي ويلي، خو په مخکينيو څرګندونو کې يې ټول ملکي وګړي ګڼلي وو.
د طالبانو د بهرنيو چارو وزارت يوه مقام شفيع اعظم د يوه طالب عسکر عکس هم خپور کړی او ویلي،چې په نننۍ پېښه کې وژل شوی دی.
د طالبانو د امنیه قومندانۍ ویاند د پېښې د څرنګوالي په اړه وايي:« د وزیر اکبرخان جامع جومات مخې ته یو موټر چې چاودېدونکي مواد په کې ځای پر ځای و، منفجر شو»
د طالبانو د ادارې عمومي ویاند ذبیح الله مجاهد د جوماتونو او لمونځ کوونکو هدف ګرځول ستر او نه بښونکی جنایت ګڼلی.
د پېښې مسووليت چا پر غاړه نه دی اخیستی.
د افغانستان لپاره د امريکا متحده ايالاتو سفارت، چې له قطر هېواد څخه خپلې چارې سمبالوي او د افغانستان پخواني ولسمشر حامد کرزي دا پېښه غندلې ده.
پرون ماښام د کابل په خيرخانې سیمه کې د طالبانو یوې پوستې ته څېرمه هم د درنې چاودنې خبر ورکړل شوی و.
په وروستيو ورځو کې له کابل څخه د ورته پېښو خبرونه زیات شوي.