تاند:( سې شنبه،د سنبلې دوه ويشتمه) په کابل کې د طالبانو د حاکمې ادارې ویاند ذبیح الله مجاهد وايي په افغانستان کې د بشري حقونو د وضعیت په اړه د ملګرو ملتو د استازي ریچارډ بېنېټ راپور مغرضانه او له واقعیتونو څخه لیرې دی.
د مجاهد په وينا، نوموړي په خپل راپور کې د دوی د يو کلنې واکمنۍ پر سلګونو پرمختګونو سترګې پټې کړي.
طالب ویاند زیاتوي،چې د ملګرو ملتونو راپور جوړونکي یو څو مشخصو مواردو ته په غلط برداشت او ناسمو معلوماتو سره اشاره کړې.
د طالبانو د ادارې وياند زياتوي:«نن په افغانستان کې د ښځو ژوند ته کوم تهدید متوجه نه دی، هيڅ افغان ښځه په جګړو او چاپو کې نه خپله وژل کیږي اونه هم نورخپل خپلوان له لاسه ورکوي، اوس د افغان میرمنو عزت ته څوک په سپکه نشي کتلای.»
ذبیح الله مجاهد په زندانونو کې د سلګونه تنو بې ګناه کسانو د موجودیت ادعاوو ته په اشارې لیکلي:«د هيڅ افغان میرمنې اولادونه په بي ګناه ډول په زندانونو کې نه دي پراته، په هیواد کې ۱۸۱ دولتي او شخصي پوهنتونونه د ښځينه وو او نارینه وو پرمخ خلاص دي، د هیواد پاتې ۷۰ سلنې خاورې ته د تعلیم اوتربيې پروسه غزول شوې ده.»
مجاهد د ملګرو ملتونو سازمان د کړنو په اړه نیوکې کړي او ويلي:«له دې سرچپه قضاوت څخه جوتیږي چې د دغه لوی نړیوال سازمان څخه په څومره ښکاره ډول سوء استفاده کیږي او په آدرس يې غلط معلومات خپریږي؟؟!»
د طالبانو ویاند زیاتوي:«داچې د ملګروملتونو له آدرسه بې مسئولیته، عقده مندانه څرګندونې خپریږي او د ا.ا په ضد خصمانه دريځ نیول کیږي، موږ يې غندو او د تأسف وړ يې بولوو.»
د ده په ادعا ،داسې کړنو دوام به د دغه ستر سازمان نړیوال حیثیت لا هم تر پوښتنې لاندې راولي او واضحه به شي چې دغه سازمان نړیوالو مسائلوته یواځې د څو هیوادونو له عینکو څخه ګوري او پرپاګند کوي.
دا په داسې حال کې ده،چې هره ورځ د افغانستان له مختلفو سيمو څخه د طالبانو د مخالفانو د صحرايي محکمو، وژنو،شکنجو او سپکاویو راپورونه خپريږي.