تاند:(سې شنبه،د سنبلې پینځلسمه) د بیان ازادۍ او رسنيو خلاف د طالبانو پر قیوداتو له پراخو نیوکو سره بیا هم د طالبانو څ اطلاعاتو او فرهنګ وزير ملا خیرالله خیرخواه تېر کال د رسنيو او خبريالانو لپاره ښه کال وباله.
نوموړي نن په یوه خبري غونډه کې وويل،چې د یاد وزارت اړوند سلګونه جریبه غصب شوې ځمکې له غصب څخه خلاصې کړې دي.
نوموړي تېر کال د رسنیو لپاره هم ښه یاد کړ، ځکه په خبره یې په دې موده کې هېڅ خبریال د رسنیز فعالیت له کبله نه دی وژل شوی.
هغه دا هم وويل،چې د رسنيو د اقتصادي ستونزو د هوارولو په موخه یې د مالیې وزارت له چارواکو سره خبرې کړي، ترڅو پر رسنیو باندې مالیات کم کړي.
د طالبانو د اطلاعاتو او فرهنګ وزارت د فرهنګي یرغل پر وړاندې د جدي مبارزې خبر هم ورکړ او له رسنیو څخه يې په کلکه غوښتنه وکړه، چې خپل نشرات د ملي ګټو په پام کې نیولو سره تنظیم او د داسې خپرونو له نشر څخه دې ډډه وکړي، چې د ژبنيو، سمتي او مذهبي اختلافاتو د رامنځته کېدو سبب ګرځي.
د طالب چارواکو یادې څرګندونې په داسې حال کې دي،چې نیږدې هره ورځ د رسنيو او خبريالانو پر وړاندې په افغانستان کې د نویو شکنجو، سانسور، قيوداتو او هېواد نه د افغان خبریالانو د تبعید کیدو په اړه خبرونه خپریږي.