تاند:(دوشنبه،د سنبلې څوارلسمه) د طالبانو د بهرنیو چارو وزیر مولوي امیر خان متقي نن ماښام د روسيې د بهرنیو چارو له وزیر سرګي لاوروف سره ټیلیفوني خبرې کړي.
د طالبانو د اعلاميې له مخې،په دې ټليفوني اړيکه کې ملا متقي روسي وزير ته په کابل کې د روسيې سفارت ته څېرمه د نننۍ چاودنې له امله د خپلې خواشینۍ او غم شریکۍ مراتب وړاندې کړل او د هر اړخیزو څېړنو ډاډ یې ورکړ.
متقي وویل:« دواړه لوري باید اجازه ور نه کړي چې د دښمنانو دغه ډول منفي کړنې د دواړو هېوادونو پر نږدې او مثبتو اړیکو منفي اغېز وکړي.»
د طالبانو په اعلامیه کې راغلي،چې د روسیې د بهرنیو چارو وزیر دغه پېښه د نړیوالو جنایتکارو سازمانونو کار وباله او د هغوی پرخلاف يې پر مبارزې ټینګار وکړ.
ويل شوي،چې مولوي متقي سرګي لاوروف ته ډاډ ورکړ، چې د طالبانو ځواکونه به د روسيې سفارت خوندیتوب ته ځانګړې پاملرنه کوي.
سرګي لاوروف په يوه بل غبرګون کې ویلي،چې په کابل کې پر خپل سفارت د نننۍ پېښې عاملين به د پېښې په اړه ځواب ووايي.
نوموړي په یوه لنډه اعلامیه کې دا خبره کړې، خو نه ېې دي ويلي چې دا پېښه چا کړې او دوی به څه ورسره کوي؟
د روسیې د بهرنیو چارو وزارت تایید کړه،چې کابل کې ېې سفارت ته څېرمه د ننني برید پر مهال دوه ډیپلوماټان وژل شوي.
بلخوا: په کابل کې د طالبانو د ادارې د امنیې قومندانۍ ویاند خالد ځدراڼ د يادې پېښې نوعیت ځانمرګی برید ښودلی او ویلي،چې يو ملکي وګړی پکې وژل شوی او ۱۰نور ټپیان دي.
د هغه په وينا، د روسیې سفارت سره نږدې یوه ځانمرګي بریدګر غوښتل د خلکو په ګڼه ګوڼه کې ځان ته چاودنه ورکړي، خو موخې ته له رسېدو مخکې د دوی ځواکونو په نښه کړی چې له امله یې چاودنه رامنځ ته شوې.
ځينو نورو سرچينو په پېښه کې د شل تنو د مرګ ژوبلې خبر ورکړی.
د پېښې مسووليت چا پر غاړه نه دی اخیستی.