تاند:(شنبه،د سنبلې دولسمه) د طالبانو د رژيم د سترې محکمې د دارالافتا لوى رييس شيخ عزيزالله مظهري نن د دغې دارالافتا په اړه په یوه خبري غونډه کې معلومات ورکړي
نوموړي ويلي،چې د سترې محکمې د دارالافتا رياست رييس او مفتيان لري چې په بېلابېلو برخو کې د اړتيا له مخې د شريعت او د حنفي فقې له مخې فتوا ورکوي.
د نوموړي د معلوماتو له مخې، تر اوسه پورې د دغه رياست له لوري ٤١٠ فتواوې صادرې شوې دي.
هغه د ورکړل شويو فتواوو په اړه نور جزییات نه دي ورکړي.
د طالبانو منتقدین بيا انديښنه لري،چې د طالبانو په داسې ادارو کې د ډېرو سخت دریځو ملایانو موجودیت به افراطي کړنې تشویق کړي.
هغوی غوښتنه کوي،چې په داسې ادارو کې دې د شرعياتو متخصصين پر دندو وګوماري.