تاند:(جمعه،د سنبلې يوولسمه) د طالبانو د رياست الوزراء اقتصادي مرستيال الحاج ملا عبدالغني برادر اخوند هرات ته د سفر پر مهال وويل،چې د دوی اداره وتوانېده، چې د بهرنیو اسعارو پر وړاندې افغانۍ باثباته وساتي.
د هغه په وينا، دا کار په داسې حال کې شوی، چې د سیمې باثباته هېوادونه د خپلو اسعارو د ثبات ساتلو په برخه کې پاتې راغلي دي.
ملا برادر زياته کړه،چې د هرات د صنعتکارانو، سوداګرو او پانګه والو ډېرې ستونزې حل شوې او کومې، چې پاتې دي هغه ته به هم ژر تر ژره رسېدنه وشي.
د هغه په خبره، په نیږدې راتلونکي کې به د ټاپي پروژې چارې له هرات څخه پیل شي او لومړۍ ګټه به يې هم د دغه ولايت اوسېدونکو ته ورسېږي.
ملا برادر وويل، چې پر ټاپي پروژه سربېره به د هرات ولايت په صنعتي پارک کې پنځم فاز چارې هم شروع شي، د پل هاشمي په سيمه کې به صنعتي ښارګوټى جوړ او د پاشدان او شنډنډ بندونو کارونه به هم په نږدې راتلونکي کې بيا پيل شي.
د طالبانو دغه لوړپوړي چارواکي په داسې مهال دا څرګندونې کړي،چې اقتصادي شنونکي له افغانستان سره د نړيوالو د بشري مرستو اونيزې ۴۰ميلیون ډالري مرستې د افغانیو د ثبات ساتلو لپاره مهم ګڼي.