تاند( سې شنبه، د سنبلې اتمه) د ملګرو ملتونو سازمان يو ځل بيا د نړۍ له هېوادونو غوښتي،چې د طالبانو د کړنو سزا دې افغانانو ته نه ورکوي او په دې هېواد کې ځنډولې پراختيايي مرستې دې له سره پیل کړي.
د دغه سازمان په تازه څرګندونو کې راغلي،چې پر افغانستان د طالبانو حاکمه اداره د پانګونې او خدماتو پيسې نه لري، په داسې حال کې چې په افغانستان کې د فقر لمنه ورځ تر بلې د پراختيا په حال کې ده.
دا په داسې حال کې ده،چې د ملګرو ملتونو په يوه ځانګړې غونډه کې پرون د طالبانو په اړه د امریکا، روسیې او چین د استازو ترمنځ ناندرۍ شوي.
روسیې او چین د طالبانو د مشرانو د سفرونو د بندیزونو په اړه د امریکا د مخالفت دوام په افغانستان کې پر خپلې ماتې د دغه هېواد د پردې اچولو هڅه ګڼلې،خو د امریکا استازي ویلي چې د طالبانو له واکمنيدو سره دوی د ترهګرو ډلو خلاف د ژمنو د عملي کولو پر ځای د القاعدې شبکې مشر ته په کابل کې پناه ورکړې وه.
له دې ټولو ناندريو سره، په افغانستان کې د اقتصادي سقوط له امله ورځ تر بلې د فقر د شدت او له دې کبله د خلکو د مرګ د ګواښ د زیاتیدو خبرونه ورکول کيږي.