تاند( دوشنبه ، د اسد ۳۱ مه) رويټرز خبري اژانس د خپلو سرچينو په حواله خبر ورکړی،چې امریکا متحده ایالاتو د کابل په شېرپور کې د طالبانو تر چتر لاندې د القاعدې شبکې د مشر ایمن الظواهري له وژل کيدو سره بيا هم طالبانو سره د افغانستان د کنګل شویو بانکي زېرمو د خلاصون په اړه مذاکراتو ته دوام ورکړی.
دغه اژانس زياتوي،چې امریکا د سویس یوه بانک ته د ګنګل شویو دغو بانکي زېرمو د یوې برخې د انتقال په اړه لېوالتيا ښودلې،خو ټينګار ېې دا دی،چې يو نړيوال پلاوی به ورڅخه څارنه کوي او طالبان به کنټرول نه ورباندې لري.
مخکې وال سټريټ ژورنال ورځپاڼې د افغانستان لپاره د امريکا د ځانګړي استازي ټام ويسټ په قول لیکلي وو،چې امریکا له طالبانو سره د يادو بانکي زېرمو د یوې برخې د خلاصون په اړه خپل مذاکرات بيرته ودرولي دي.
د امریکا او طالبانو چارواکو په دې اړه څه نه دي ويلي.
مخکې امريکايي چارواکو منلې وه،چې طالبانو سره د ځينو شرايطو په مقابل کې د افغانستان د کنګل کړې شاوخوا لس میلیارده ډالره بانکي زېرمې د درېیمې برخې په خلاصون مذاکرات پیل شوي.