تاند (يکشنبه ، د اسد ۳۰ مه) د طالبانو د حکومت وياند ذبيح الله مجاهد وايي چې د دوی د عمومي مشر ملا هبت الله اخوندزاده د فرمان پر اساس د واکمنۍ په تشکیلاتو کې يې لاندې ټاکنې وشوې:
- د دفاع وزارت د ټکنالوژۍ او لوژستیک معین مولوي عطاء الله عمري د کرنې او مالدارۍ وزارت د سرپرست په حیث.
- د کرنې او مالدارۍ وزارت مخکینی سرپرست مولوي عبدالرحمن راشد د مهاجرینو وزارت د مهاجرینو چارو د معین په حیث.
- ملا عبدالقیوم ذاکر د پنجشېر ولایت او اندراب د عمومي نظامي مسئول په حیث.
- د روزګان مخکینی والي ملامحمد خان دعوت د پکتیا د والي په حیث.
- د پکتیا مخکینی والي مولوي محمدعلي جان احمد د روزګان ولایت د والي په حیث.
- ملا محمد طیب حقاني؛ د پنجشېر ولایت د امنیه قومندان په حیث.
- د فراه ښاروال مولوي عبدالظاهر خادم د دغه ولایت د امنیه قومندان په حیث.
- د فراه د لواء مخکینی قومندان مولوي عبدالولي ادریس د فراه د ښاروال په حیث.
- مسافر د پنجشېر ولایت د لواء د قومندان په حیث.
د فراه امنیه قومندان ملانعمت الله معصوم د فراه د لواء د قومندان په حیث وټاکل شول.
په دې ټاکنو کې د ملا قيوم ذاکر نوې دنده د ډېر پام وړ ګرځیدلې، ځکه پنجشېر او اندراب سره جلا اداري واحدونه دي، خو له دواړو سيمو څخه د طالبانو پر ضد د وسله وال مقاومت خبرونه ورکول کېږي.
ملا قيوم ذاکر د طالبانو د دفاع وزارت مرستيال او په شل کلنه جګړه کې عمومي نظامي مسوول پاتې شوی و.