تاند( شنبه ، د اسد ۲۲ مه) د طالبانو چارواکو ویلي،چې مولوي محمدالله (برا) يې د ننګرهار د استخباراتو نوی رییس ټاکلی.
د طالبانو تر کنټرول لاندې باختر خبري اژانس ویلي،چې ملا برا له دې وړاندې په کاپیسا کې د دوی د والي په صفت دنده ترسره کړې.
طالبانو د نوموړي د ګومارنې او مخکیني ځای ناستي د ګوښه کيدو دليل ېې نه دی روښانه کړی.
په ننګرهار کې د طالبانو د استخباراتو مخکینی رییس ډاکټر بشير د داعش ډلې سره د تړاو په تور د لسګونه مخکينيو امنيتي ځواکونو، اهل حدیثو یا سلفي نطريې پلویانو او خپلو شخصي مخالفانو په وژلو تورن و.
په دې اړه څه موده مخکې د بښنې نړېوال سازمان یو ځانګړی راپور هم خپور کړی او پر دغه طالب مقام یې د شته تورونو يادونه کړې وه.
طالبانو په ښکاره نه دي ويلي،چې ډاکټر بشير ېې د دغو تورونو له کبله ګوښه کړی، خو د ګوښه کیدو له اعلان څخه ېې اټکل کیږي، چې دا پریکړه د بښنې نړېوال سازمان له راپور خپريدو سره تړاو لري.
طالبانو رسما په دې اړه څه نه دي ويلي.