تاند( سې شنبه ، د اسد ۱۸ مه) خبري سرچينو له پنجشېر ولايت څخه په يوه راپور کې خبر ورکړی،چې د حزب التحرير ډلې غړو د طالبانو د ځایي امنيتي چارواکو په همکارۍ د پنجشېر په بازارک سيمه کې د القاعدې د وژل شوي مشر ایمن الظواهري غايبانه جنازه کړې ده.
ويل شوي،چې د جنازې د دغو مراسمو مشري په پنجشېر کې د طالبانو د استخباراتو مرستيال آغا مير کوله او د دې ډلې د امنيت آمر عبدالله صديقي هم ګډون پکې کړی و.
طالبانو په دې اړه څه نه دي ويلي.
حزب التحرير،چې د نړيوالو ترهګرو ډلو له فکري تغذيه کوونکو ډلو ګڼل کېږي، په پنجشېر ولايت کې پراخ نفوذ لري.
نیږدې دوه اونۍ مخکې د امريکا ولسمشر جوبایډن د کابل د وزیر اکبرخان او شېرپور سیمو تر منځ د بې پیلوټه الوتکې د يوه برید پر مهال یې د القاعدې شبکې د مشر ایمن الظواهري د وژلو خبر ورکړ.
طالبانو په دې اړه له څو ورځينۍ چوپتيا وروسته په ځينو ولایتونو کې د امریکا د دغه برید خلاف لاريونونه وکړل، خو ډېر شنونکي باور لري چې ياد شوی برید خپله د طالبانو په همکارۍ تر سره شوی.