تاند( يکشنبه ، د اسد ۹ مه) کابل ته د پاکستان د مشهور ملا تقي عثماني په مشرۍ د پاکستاني ملایانو د يوې ډلې د سفر او لیدنو کتنو پر وړاندې د افغانانو توند غبرګونونه دوام لري.
دغه پلاوی، چې خو ورځې مخکې ظاهرآ طالب مشرانو ته د مشورو په موخه کابل ته راغلی و ، اوس ویل کېږي چې د طالبانو له ادعا شوي لوی مشر ملا هبت الله اخندزاده سره د ليدنې لپاره کندهار ولايت ته روان شوی.
د ياد سفر پر مهال طالب چارواکو سره د دغه پلاوي مغرورانه او د طالب چارواکو تحقير شوې څېرې د افغانانو له توندو غبرګونونو سره مخامخ شوي دي.
د افغانستان د پرزول شوي نظام د ولسمشر لومړي مرستيال امرالله صالح په يوه غبرګون کې ویلي، چې په نکريزو د ږيرې سور کوونکی ملا تقي عثماني د طالبانو د عمومي امیر حیثیت لري او د دې ډلې د کړنو د ارزونې لپاره کابل ته راغلی.
د صالح په وينا، نوموړی د پاکستان د پوځ او استخباراتو له نيږدې متحدينو څخه دی او د ۲۰۱۹- ۲۰۲۱ تر منځ ېې د طالبانو د اولامر رول لوبولی.
د ده په وينا په راپورونو کې نوموړی د امریکا او طالبانو ترمنځ د دوحې د سولې تړون له اصلي لوبغاړو څخه و او د ناټو پوځي او استخباراتي افسران پر طالبانو د نوموړي له اغېزو خبر دي.
امرالله صالح يادونه کړې، چې مذهبي افراطیت او مدرسه د اسلام اباد د بهرني سياست لپاره د ملېشه سازۍ تر ټولو ارزانه وسیله ده.
صالح زياتوي، چې د پاکستاني ملایانو له لوري پر تخت په غځیدلي ډول، په داسې حال کې چې ګوته ېې هم په پوزه کې وي، د طالب مشرانو احضارول نوې خبره نه ده، ځکه طالبان د دغو څېرو نفوذیان او پوروړي دي.
د پاکستاني ملایانو د دغه سفر پر مهال د طالبانو له رییس الوزرا ملا محمد حسن اخند او د لوړو زده کړو وزير مولوي عبدالباقي حقاني سره د دغو ملایانو د لیدنو ځینې عکسونو ډېر نور افغانان هم قهرولي دي.
د پاکستاني ملایانو د پلاوي یوه غړي د طالبانو له لوري د افغان نجونو له شپږم ټولګي څخه د پورته ښوونځيو د پرانيستلو خبر هم ورکړی.
ډېرو خلکو په دې اړه په خپلو غبرګونونو کې ویلي، چې د طالبانو پریکړې ټولې ډ پاکستان په لاس کې دي او طالبان د دغه هېواد ملېشې او د استخباراتي سیاستونو تامينونکي دي.
طالبانو بیا په دې اړه ټول تورونه رد کړي.