تاند( چار شنبه ، د اسد ۵ ) په افغانستان کې د ملګرو ملتونو د سرمنشي د ځانګړي استازي د دفتر یوناما سرپرست مارکوس پوتزل په تاشکند کې د افغانستان په اړه د تر سره شوي دوه ورځیني کنفرانس هرکلی کړی.
نوموړي ويلي، چې د يادې غونډې تر سره کیدل ښیي، چې ټول د افغانستان د جګړې او انزوا خلاف دي او هڅه کوي، چې په دغه هېواد کې ټول شموله حکومت او پخلاینه حاکمه شي.
د تاشکند غونډې له ترسره کيدو وروسته د طالبانو وياندويانو دا غونډه د طالبانو لپاره بریالۍ وبلله، خو په غونډه کې د نړیوالو بنسټونو او مختلفو هېوادونو استازو ټینګار درلود، چې په افغانستان کې دې ټول شموله حکومت رامنځته او له ټولو ترهګرو ډلو سره د اړیکو پرې کیدو ډاډ ورکړل شي.
د افغانستان لپاره د اروپايي ټولنې استازي بیا د طالبانو د يوه مطبوعاتي مبلغ د ټویټ په غبرګون کې ویلي، چې افغانستان دمګړۍ کوم رسمي حکومت نه لري او د تاشکند غونډې ټولو ګډونوالو طالبانو ته د « حکومت » نه ، بلکې د « طالبانو» خطاب کړی دی.
د ازبکستان د تاشکند غونډه، چې پرون د دوو ورځو لپاره د افغانستان په اړه تر سره شوه، د طالبانو د پلاوي تر څنګ د افغانستان لپاره د امريکا ځانګړي استازي ټام ويسټ او د شاوخوا شلو هېوادونو او نړيوالو سازمانونو استازو ګډون کړی و.