تاند( چار شنبه ، د اسد ۵ ) د طالبانو د رئیس الوزراء مرستیالانو: ملا عبدالغنی برادر اخند او مولوی عبدالسلام حنفي د کجکي بریښنا دويم فاز د ۱۰۰ میګاواټه پروژې افتتاح وکړه.
ملا حنفي په دې مراسمو کې ادعا وکړه، چې په افغانستان کې شل کاله د حقوق بشر، حقوق زنان او دیموکراسی په نوم جنګ وشو خو غوښتونکو یې د ځنګل قانون جاري کړی و.
د ده په وينا، د دوی علماءو، طالب العالمانو او محصلینو پر سینه بمونه ومنل خو«نړیوال اشغالګران» یې له دې خاورې وشړل.
ملا حنفي زياته کړه، چې دوی ۱۳ میلیارده افغانۍ يوازې د سږ کال لپاره د شهیدانو د یتیمانو لپاره ځانګړي شوي دي، د ټولو یتیمانو لپاره دي که د دوی د صف وه او که یې مقابل کي جنګیدونکي عسکر.
په افغانستان کې د ترکیې سفیر جیهاد ارگینآی وويل: زموږ او د افغانستان هیواد اړیکې زیاتې او ژورې دي چي د کجکي پروژه یې یوه نمونه یادولی شو.
د طالبانو د بهرنیو چارو وزارت معین شیر محمد عباس ستانکزي په دې مراسمو کې وويل: نن هغه هلمند کي د یوې پروژې افتتاح کیږي چي اوس یې هم انګلیستان کي پوځي جنرالان د نوم په اوریدلو لړزیږي.
د برېښنا شرکت مرستیال مولوي عبدالرحمن رحماني په دې مراسمو کې وويل: تر کندهار پورې د مزي پیاوړتیا او د کندهار او غزني لوړ ولټاژ مزي نښلول د راتلونکې سترې پروژې دي، چې په مسیر کې به یې ۵ سب سټیشنونه جوړیږي.
د ده په وينا،کجکي کې د نوي پاور هاوس جوړول د ۱۰۴.۹ میلیونه ډالرو په ارزښت دافغانستان برېښنا شرکت راتلونکی پلان دی.
د افغانستان د اوبو د تنظيم د ملي ادارې پخواني رييس انجنير خان محمد تکل د دې پروژې د پیل له کبله خلکو ته مبارکي ویلې او ليکلي: د پروژې اساسي کار چې د پارچاوې جوړول، د دهراود، غورک او کجکي د اولسوالیو د هغه برخو استملاک دي، چې د بند په کاسه کې د ډیرو اوبو د ذخیره کولو په وجه متضرر کيږي، کورونه مځکې یی تر اوبو لاندې کیږي لا پاتې دي.