تاند( يکشنبه ، د اسد دويمه ) د ازبکستان پلازمېنه تاشکند به سبا د افغانستان په اړه د یوې دوه ورځنۍ غونډې کوربه وي د
دې کنفرانس ته د طالبانو د حکومت استازي هم وربلل شوي.
او د ازبکستان د بهرنیو چارو وزارت ویلي چې دغه اقدام د طالبانو د حکومت د په رسمیت پیژندلو په معنی نه دی.
د طالبانو د حکومت د بهرنیو چارو سرپرست وزیرامیرخان متقي په مشرۍ یوپلاوی نن هغه هیواد ته روان شو.
په دغه کنفرانس کې به چې د افغانستان د اقتصادي او امنیتي ودې په نوم جوړیږي، د شاوخوا شلو هیوادونو او نړیوالو سازمانونو استازي ګډون وکړي. د کنفرانس ګډونوال واک ته د طالبانو له رسیدو وروسته د افغانستان امنیتي، سیاسي او اقتصادي وضعیت څیړي.
د طالبانو حکومت چې نژدې کال یې په پوره کیدو دی، تراوسه د نړۍ هیڅ یوه هیواد په رسمیت نه دی پیژندلی.
ياده غونډه په داسې حال کې جوړیږي، چې د ازبکستان او تاجيکستان پر خاورې په وروستيو کې څو ځله د افغانستان له خاورې د توغندیو د برید خبر ورکړل شوی.
د دغو بریدونو هدف داعش ډلې پر غاړه اخیستی.
يادو بریدونو او د افغانستان په شمال کې د تاجیکستان او سیمې د نورو هېوادونو پر ضد جوړو شويو ډلو د افغانستان له خاورې سیمه ییزو هېوادونو ته د خطرونو اندیښنې پیدا کړي دي.