تاند(پنجشنبه، د سرطان ۳۰مه) د امریکا د باندنیو چارو وزارت وايي، په دې مشورې روانې دي چې د افغانستان د کنګل شویو شتمنیو نیمايي دې هیواد ته بېرته ورکړل شي.
د امریکا د بهرنیو چارو وزارت ویندوی ټیډ پرایس په یوه خبري غونډه کې وویل، له طالبانو سره په دې خبرې کېږي چې د افغانستان یوازې نیمايی شتمني بېرته ورکړل شي.
د ۲۰۲۱ د اګست په ۱۵ مه د طالبانو له واک ته رسېدو وروسته د افغانستان بانک نهه نیم میلیارد ډالره شتمني، چې د امریکا په بانکونو کې وه، د دغه هیواد د حکومت له لوري کنګل شوه.
پرایس زیاته کړه، د امریکا د حکومت له لوري په دې خبرې روانې دي چې د افغانستان نیمايي کنګل شوې شتمني په څه ډول داسې ازاده شي چې طالبان نه بلکې افغانانو ورڅخه ګټه واخلي.
د امریکا ولسمشر او سپینې ماڼۍ تېر ژمی ویلي و چې د افغانستان د شتمنیو ۳ میلیارده د ۲۰۰۱ د سپټمبر د یوولسمې د قربانیانو کورنیو ته د تاوان په توګه ورکوي او ۳ میلیارده نور افغانانو ته د بشري مرستو په توګه ورکوي. خو د امریکا دا اعلان د ګڼو افغانانو او نورو له انتقاد سره مخامخ شو.
سپینې ماڼۍ په عین حال کې ویلي و تر څو چې محکمې پرېکړه نه وي کړې تر هغو د سپټمبر د یوولسمې د قربانیانو د کورنیو غړیو ته افغانستان پیسې نه ورکوي.
د طالبانو حکومت او د افغانستان بانک تراوسه پورې د امریکا د باندنیو چارو وزارت د تازه څرګندونو په اړه څه نه دي ویلي.