تاند( جمعه ، د سرطان ۲۴ ) د پاکستان پوځ تایید کړه، چې د بلوچستان د ازادي غوښتونکي پوځ په لاس د خپل یوه پوځي افسر وژل کیدل تایید کړل.
د پاکستان پوځ ویلي، چې نوموړی د بلوڅ آزادي غوښتونکي پوځ له لوري لومړی تښتول شوی او بيا په ډزو وژل شوی دی.
د بلوڅ ازادي غوښتونکي پوځ له لوري ويل شوي، چې د لایق بیګ میرزا په نوم وژل شوی دغه پوځي يې له تښتولو وروسته د خپلې پوځي محکمې په امر اعدام کړی دی.
پاکستاني چارواکو ویلي، چې دغه پوځي افسر د تېرې سې شنبې په ورځ د بلوچستان ایالت له کوټې ښار څخه تښتول شوی و.
د پاکستان تر ولکې لاندې د بلوچستان ايالت ازادي غوښتونکي له څو لسیزو راهیسې د پاکستان د پنجابي استبداد او حاکمانو خلاف وسله واله مبارزه کوي.
دوی په وروستيو کې خپلې مبارزې تر پخوا لا چټکې کړي، چې د پاکستاني استبداد د مخالفانو له هرکلي سره مخامخ شوي دي.
څه موده مخکې د بلوڅ ازادي غوښتونکي پوځ اړوند يوې مېرمنې، چې د دوکتورا تر کچې ېې زده کړې کړې وې، د پاکستان په یوه پوهنتون کې د څو چینایي استادانو پر موټر ځانمرګی برید وکړ او ویې وژل.
د دغه برید هدف د چینایي کمپنيو له لوري د بلوچستان له کانونو پراخه استفاده او بلوچانو ته ېې د ګټې نه رسیدل ښودل شوي وو.