تاند(جمعه، د سرطان ۲۳ مه) د پاکستان اسعاري زېرمې په یوه اونۍ کې د نژدې ۱۰۰ میلیون ډالرو په اندازه کمې شوې
د پاکستان یو خصوصي تلوېزیون جیو نیوز وایي چې د دغه هېواد د بهرنیو اسعارو زېرمې د جون د ۳۰مې او د جولای د ۷مې تر منځ موده کې د ۹۹ میلیونو ډالرو په اندازه کمې شوي دي.
ویل کیږي چې د پاکستان د خزانې دغه کمی په چټکۍ سره پر مخ روان دی او وېره شته چې دغه هېواد د سریلانکا په برخلیک باندې اخته شي.
جیو نیوز لیکلي چې په دې سره د دغه هېواد د بهرنیو اسعارو هغه زېرمې چې د پاکستان دولتي بانک تر کنټرول لاندې دي، له ۹۸۱۶ میلیونو څخه ۹۷۱۷ میلیونو ډالرو ته را کمې شوې.
تر یادې نېټې پورې، د پاکستان دولتي بانک د ۹۷۱۷ میلیونو ډالرو په ارزښت او د دغه هېواد خصوصي بانکونو د ۵۸۹۳ میلیونو ډالرو په ارزښت اسعاري زېرمې لرلې چې ټوله اندازه یې ۱۵۶۱۰ میلیونه ډالر کېږي او د دغه ۲۲۵ میلیونه نفوس لرونکي هېواد لپاره ډېرې کمې بلل کیږي.
جیونیوز لیکلي چې په یاده اونۍ کې دغه ۹۹ میلیونه ډالر د بهرنیو سودي پورونو په تادیه کولو کې لګول شوي، او پاکستان مجبور دی چې هره اونۍ دومره یا تر دې ډېر پور بېرته تادیه کړي.
په ورته وخت کې د پاکستان یو ګاونډی هندوستان چې پاکستان یې خپل دښمن بولي له ۶۰۰ میلیاردو ډالرو څخه چې د پاکستان د اسعاري زېرمو ۴۰ برابره کېږي لري، او افغانستان چې له تېرو څلور نیمو لسیزو راهیسې پاکستان په کې د هرې هغې ډلې ملاتړ کړی چې د خپل هېواد د مرکزي حکومتونو پر ضد جنګ کوي له لس میلیاردو ډالرو څخه ډېرې اسعاري زېرمې لري، په داسې حال کې چې د وګړو شمېر یې د پاکستان د وګړو له شمېر څخه پنځه نیم برابره کم دی.
د پاکستان د چارو پوه جهانګیر خټک وایي چې د ډالر په مقابل کې د پاکستانۍ روپۍ د ارزښت د لوېدلو په لړ کې د یوې روپۍ په زیاتېدلو سره په پاکستان باندې د بهرنیو پورونو په اندازه کې له ۶۵۰ میلیونو ډالرو څخه ډېر پور زیاتېږي او ویل کیږي چې د تېرو څلور نیمو کالونو په ترڅ کې د ډالر په مقابل کې د پاکستانۍ روپۍ ارزښت د ۷۴ روپیو په اندازه کم شوی دی.
دا وخت په پاکستان باندې د ولاړ بهرني پور اندازه ۱۲۸ میلیارد ډالر ده او دغه هېواد وایي چې د اقتصاد د سقوط او د سریلانکا په برخلیک د اخته کېدلو د مخنیوي لپاره په بیړني ډول ۴۰ میلیاردو ډالرو ته اړتیا لري ځکه پاکستان مجبور دی چې په یوه کال کې دننه ۲۱ میلیارده پور تادیه کړي او نور د اقتصاد د ټینګ ساتلو لپاره ولګوي، خو تر اوسه پورې یوازې آی اېم اېف یوازې د ۶ میلیاردو ډالرو د ورکولو په رابطه زرغون څراغ ښودلی او هغه هم په یوه کال کې او په دې شرط چې پاکستان باید په خپلو وګړو باندې ډېر سخت شرایط او مالیات ولګوي.