تاند ( جمعه ـ د میزان ۶مه) د ننګرهار ولایت په کوز کونړ ولسوالۍ کې د اورښتونو له کبله سېلابونو راوتلي او خلکو ته یې مالي او ځاني زیانونه اړولي.
د طالبانو تر واک لاندې باختر آژانس د خبر له.مخې دا سیلابونه نن سهار د کوز کونړ ولسوالۍ اړوند کنډي، غازي آباد، جنت خان، قلعه ټک، سلامپور او یو شمېر نورو کلیو کې د ډېرو اورښتونو له کبله سېلابونه راوتلي، چې له امله یې ۳ مړه شوي او ۲۰ نور ژوبل شوي دي.
د سرچینې د خبر له مخې په دې سیلابونو کې تر ۱۵۰ کورونه په بشپړ او قسمي ډول تخریب شوي دي.
دغه راز په یاده سیمه کې د مروارید کانال هم د سېلاب له کبله تخریب او شلېدلی، چې اوبو یې کهنه ده کلی زیانمن کړی دی.
په دې وروستیو کې د ورښتونو او سیلابونو له امله په افغانستان کې خلکو ته سخت مالي او ځاني زیانونه واوښتل.
تر دې وړاندې هم د ننګرهار مرکز جلال اباد ښار د بارانونو له امله د سیلابونو شاهده وه چې له امله یې د ځاني زیان ترڅنګ لسګونه کورونه ويجاړ کړي وو.