تاند( دوشنبه ، د سرطان دیارلسمه ) د افغانستان په بازارونو کې د تېلو له بېساري کمښت سره خلک د دې ستونزې حل ته عاجله او اساسي پاملرنه غواړي.
د راپورونو له مخې، نن د یوه لیټر ډیزل تېلو بيه د هېواد په بازارونو کې تر ۱۲۰ افغانيو هم رسيدلې وه.
د طالبانو د صنعت او سوداګرۍ وزارت وايي، د تیلو بيې یوازې په افغانستان کې نه، بلکې د ټولې نړۍ په بازارونو کې د یوکراین او روسيې د جګړې له امله لوړې شوې دي.
د طالبانو د رياست الوزراء اقتصادي معاونیت بیا په دې برخه کې له نوم اخیستو پرته ځینې کړۍ ملامته ګڼي.
دغه معاونیت په یوه اعلامیه کې ویلي:« راپورونه مو تر لاسه کړي چې د تېلو د نرخونو په لوړولو او د بحراني حالت په رامنځته کولو کې ځینې کړۍ لاس لري. »
سرچینه زیاتوي:« معاونیت د نرخونو د راټیټولو په اړه له ټولو ممکنو لارو کار اخلي او هغه اشخاص تعقیبوي څوک چې د دې عمل مرتکب کيږي.»
د ملا برادر دفتر خبرداری ورکړی ، چې د دغو ادعاوو د ثبوت په صورت کې به له عاملینو سره سخت قانوني چلند وشي او د تېلو د تجارتي جواز په اړه به یې جدي غور وشي.