تاند( دوشنبه ، د سرطان دیارلسمه ) د افغانستان له مختلفو سيمو څخه نن د ښځو او نجونو د ځانوژنې د څلورو پېښو خبر ورکړل شوی دی.
هرات،ارزګان،تخار او دايکندي هغه ولایتونه دي ،چې یادې پېښې پکې رامنځته شوي دي.
د یادو پېښو دليل کورنی تاوتریخوالی ښودل شوی او ځايي چارواکو ېې په جلا – جلا ډول رامنځته کيدل تاييد کړي دي.
د افغانستان د بشري حقونو د لغوه شوي کميسيون رييسې شهرزاد اکبر دغو پېښو ته په غبرګون کې ویلي،چې افغان مېرمنې او نجونې له تاويخوالي څخه د ځان خلاصولو لپاره ځان وژنې ته مخ اړوي.
په افغانستان کې د طالبانو له بیرته واکمنيدو سره، د ښځو پر وړاندې د تاوتريخوالي د لا زیاتیدو خبرداری ورکړل شوی.
دغې ډلې له واکمنيدو سره سم،د سلګونه زره نجونو او ښځو پر وړاندې د ښوونځيو او دفترونو دروازې وتړلې او کور ناستې ېې کړې.
د اقتصادي ستونزو شدت،پر راتلونکي بې باوري او د ناڅرګند برخلیک اندیښنې د افغان ښځو پر وړاندې له ناوره کولتوري رواجونو وراخوا نورې سختې ننګونې ګڼل کېږي.