تاند( دوشنبه ، د سرطان دیارلسمه ) د پاکستان تر کنټرول لاندې په قبايلي سيمه شمالي وزيرستان کې د یوه ځانمرګي برید له امله د پاکستان ۲ پوځيان وژل شوي او ۱۵ نور ټپيان دي.
د پاکستان پوځي چارواکي وايي ، چې بریدګر له موټر سايکل څخه په استفادې سره د وزیرستان په مارکت سیمه کې د پوځیانو موټرو ته نیږدې ځان والوزاوه.
دا په داسې حال کې ده ، چې د برید مسوولیت چا پر غاړه نه دی اخیستی.
د پاکستاني طالبانو تحريک، چې ظاهراً ځان د پاکستان مخالفین ګڼي او منتقدان یې د پاکستان د يوې استخباراتي پروژې په سترګه ورته ګوري ، په دې اړه څه نه دي ويلي.
مخکې یادې ډلې د ورته بریدونو مسوولیت پر غاړه اخیست.
د پاکستان حکومت په افغانستان کې د طالبانو له واکمنيدو سره ، له پاکستاني طالبانو سره د افغانستان د حاکمو طالبانو په منځګړيتوب د سولې خبرې او اوربند پيل کړی.
له دې سره هم مهاله، له څه مودې راهيسې له قبایلي سیمو څخه د داعش ډلې د تبلیغاتو او پر ضد ېې د پاکستان د اقداماتو ځینې خبرونه ورکول کېږي.
ځینې شنونکي دا د پاکستان نوې لوبه ګڼي ، چې په وینا یې ورسره غواړي د پښتنو سيمې وروسته پاتې او د خپلو استخباراتي لوبو مرکزونه وساتي.
د پښتنو ملتپاله ډلې انديښمن دي ، چې تر هر چا ډېر به د پاکستان په نویو لوبو کې بیا د پښتنو ملتپاله ډلې زیات ځپل کیږي ، ځکه چې پاکستان ېې د خپلو لوبو پر وړاندې لوی خنډ ګڼي.