تاند( پنجشنبه ، د سرطان نهمه ) د فرانسې لومونډ رسنۍ په يوه تازه راپور کې د طالبانو د لس مياشتینۍ واکمنۍ ارزونه کړې او ویلي ، چې دغه ډله د یوې حکومتي ډلې پر ځای د مذهبي پولیسو د ډلې په شان رول لوبوي او د امر بالمعروف په نوم وزارت یې له ټولو وزارتونو او ادارو څخه ډېر با صلاحيته دی.
يادې ورځپاڼې لیکلي ، چې طالبانو پر افغانستان له بیا واکمنيدو او د جمهوري نظام خلاف د ۲۰ کلنې جګړې له پای ته رسولو سره ، د افغانستان د ۳۸ میلیوني نفوس خلاف اخلاقي او دیني جګړه پیل کړه.
دغه ورځپاڼه د خلکو خصوصي ژوند او په خاص ډول د ښځو په مسايلو کې د دوی د ډېر مزاحمت کوونکي وزارت ( امر بالمعروف) يادونه کړې ، چې تقريبا ټول افغانان ورڅخه تنګ دي او شکايت ترې کوي.
د لومونډ ورځپاڼې په باور ، طالبان په افغانستان کې د حکومتولۍ د رول لوبولو او د دې پر ځای چې د مالياتي سياست ، کرنې ، ټرانسپورټ ، زيربنا او انرژۍ په اړه فکر وکړي ، ټول تمرکز یې پر دې دی چې څنګه لکه مذهبي پولیس د اسلامي شريعت هغه بڼه عملي کړي ، چې دوی باور ورباندې لري.
د طالبانو د امر بالمعروف وزارت وياند دغې ورځپاڼې ته د خپل اړوند وزارت د تر ټولو برلاسي نقش په اړه منلې ، چې ان د طالبانو د دفاع او کورنيو چارو وزارتونو څخه ډېر صلاحیتونه لري او د هغوی د سرتېرو تر څڼو ېې لاس رسیږي.
په ورته وخت کې نوموړی دا د هغې شل کلنې جګړې یو اصلي هدف بولي ، چې طالبانو تېر ۲۰ کاله د « جهاد » په نوم د افغانستان د پرزول شوي نظام خلاف تر سره کړ.
د طالبانو د امر بالمعروف وزارت يو کارکوونکی دغې فرانسوي رسنۍ پوښتلی ، چې د وزارت اصلي هدف يې څه دی ؟
د وزارت کارکوونکي ملا عبدالوحيد ورته ويلي ، چې د دغه وزارت هدف په عمومي فضا کې د نارينه او ښځو سره بېلول دي.
لومونډ ورځپاڼې د طالبانو د يوه مهم مشر او د دوی د قاضي القضات شېخ عبدالحکیم حقاني تازه چاپ شوی کتاب ، چې د طالبانو د حکومتولۍ يو اساسي او نماينده کتاب ګڼل کېږي ، بحث کړی دی.
له طالبانو څخه د ورځپاڼې د تحليګر عمومي شناخت دا دی ، چې ياده ډله د دې دنيا په اړه د فکر او تدابيرو پر ځای خدای ته د خلکو په بللو او له مرګ څخه وروسته د بل ژوند لپاره چې مسلمانان او ځينې نور ادیان باور ورباندې لري ، د خلکو چمتو کول دي.
طالبانو په دې اړه کوم مشخص غبرګون نه دی ښودلی ، خو په عمومي ډول ډېرې رسنۍ د دوی په خلاف په تبليغاتو تورنوي.