تاند( چار شنبه ، د سرطان اتمه ) د افغانستان – ایران له ګډې پولې راپورونه وايي، چې د ایراني ځواکونو له لوري د دوو افغان ماشومانو له مرګ ژوبلې وروسته ، طالبانو پرون د لږ ساعت لپاره د ايران پر خاورې يرغل وړی او يو سرتېری يې ورته وژلی دی.
د طالبانو په لاس د وژل شوي ایراني سرتیري نوم محمد صياد ښودل شوی او ایراني رسنیو یې عکسونه هم خپاره کړي دي.
ځينو ایراني رسنیو طالبانو ته د « اشرارو » ټکی کارولی او ویلي ، چې د ایران پر خاورې یې د تېرې نيت درلود.
د طالبانو او ايران چارواکو په رسمي ډول په دې اړه څه نه دي ويلي.
د ايران او طالبانو ترمنځ مخکې هم ورته څو نښتې رامنځته شوې وې.