تاند(سې شنبه ، د سرطان اوومه ) د نورستان له واما ولسوالۍ څخه راپورونه وايي چې هلته د طالبانو د ځواکونو او ورڅخه د یوه ناراضه قومندان تر منځ وسله واله نښته شوې ده.
ويل شوي چې نښته د ناراضه طالب قومندان مولوي جمعه ګل او وسله والو له لوري ېې پر سټاپ پوستې له برید وروسته پیل شوه.
د طالبانو ځواکونو بیرته پر خپلو پخوانيو طالب ملګرو ډزې وکړې ، چې په پايله کې ۲ طالبان وژل شوي او ۳ نور ټپيان دي.
د ملا جمعه ګل په اړه ويل شوي چې د یادې پوستې قومندان و، خو د اخاذۍ په تور ګوښه شوی چې اوس ېې طالبانو سره خپلمنځي ستونزې رامنځته شوي دي.
د سرچينو د معلوماتو په اساس، په دغه خپلمنځي نښته کې یو ځايي ځوان هم وژل شوی دی.
طالبانو د یادې پېښې په اړه څه نه دي ويلي.
په وروستيو کې د دې ډلې د خپلمنځي ناندريو په اړه راپورونه زیات شوي دي.
تازه د سرپل ولايت په بلخاب ولسوالۍ کې طالبانو د خپل یوه ياغي شوي هزاره قومندان مولوي مهدي د ځپلو لپاره عملیات وکړل چې ځایي خلکو پکې د ولسي مرګ ژوبلې او ځورونو ادعاوې وکړې.
طالبانو بیا دا ادعاوې رد او بې بنسټه ګڼلي دي.