تاند(یکشنبه، د سرطان ۵ مه) د افغانستان د بیارغونې لپاره د امریکا د ځانګړي سرمفتش دفتر وايي، د افغانستان د پخوانۍ ملي اردو یو شمېر ټیټ رتبه افسران له طالبانو سره یوځای شوي دي.
د جان سوپکو دفتر (سیګار) د امریکا د دفاعي استخبارتو په قول ویلي چې دا پوځیان د اقتصادي ستونزو له کبله طالبانو ته ورغلي او د هغو په لیکو کې جذب شوي دي.
سیګار دغه راز ویلي، یو شمېر نور پخواني امنیتي ځواکونه له داعش او نورو طالب ضد وسله والو ډلو سره ملګري شوي دي.
د سیګار د راپور پر اساس، څرګنده نه ده چې له طالبانو سره د افغانستان څومره پخواني پوځیان یوځای شوي او د هغو نورو په اړه هم کره شمېر څرګند نه دی چې د طالبانو له وسله والو مخالفانو سره ملګري شوي دي.
خو سیګار وايي چې د پخوانیو امنیتي ځواکونو اکثریت غړیو عادي ژوند ته مخه کړې او یو شمېر یې له افغانستانه وتلي دي.
سیګار وايي، هغو پخوانيو امنیتي افسرانو ته، چې له طالبانو سره ملګري شوي، د طالبانو په اردو کې د مشرتابه د کچې چوکۍ نه دي ورکړای شوې.