تاند( چار شنبه ، د سرطان لومړۍ) د طالبانو د بهرنيو چارو وزارت د ملګرو ملتونو سازمان د امنيت شورا له لوري د طالبانو د دوو چارواکو پر سفرونو د بندیزونو د دوام د پریکړې په غبرګون کې له دغه سازمان څخه وغوښتل ، چې د دوی په باور نور يو اړخيز قضاوت ونه کړي او د ټولو افغانانو حقونه تضمین کړي.
دغه وزارت په يوه اعلاميه کې په دې اړه ويلي: « د بهرنيو چارو وزارت د ملګرو ملتونو د وروستي اقدام ، چې د اسلامي امارت د یو شمېر لوړ پوړو چارواکو پر سفرونو یې تعزيرات د څه مودې لپاره رفع کړي ،هرکلی کوي او د دغو تعزيراتو دايمي ايسته کول، هغسې چې د دوحې په توافق نامه کې ژمنه شوې ، خپل حق ګڼي.»
طالبانو پر خپلو دوو نورو غړو د تعزيراتو لګول بې ځايه فشارونه او د ناکامو تجربو تکرار ګڼلي ، ځکه په خبره ېې کومه پایله نه لري.
د ملګرو ملتونو سازمان د امنيت شورا پرون ، د طالبانو د لوړو زده کړو وزارت پر سرپرست عبدالباقي حقاني او د پوهنې وزارت پر یوه مقام د بهرنيو سفرونو بندیز ولګاوه ، خو ۱۳ نورو چارواکو ته ېې د دغو سفرونو ۲ میاشتينۍ اجازه تمدید کړه.
ځينو نړيوالو رسنيو پر دغو طالب مشرانو د بندیزونو دلیل د نجونو زده کړو سره د دوی مخالفت او ورته ستونزې جوړول ښودلي.